Haqqımızda

Azərbaycanın ilk kiberidman brendi olan “Gaming League Azerbaijan” şirkəti 2019-cu ildə fəaliyyətə başlayıb. Hədəfi müxtəlif növ kiber oyunlar üzrə həvəskar oyunçuları professional oyunçulara çevirmək və onları dünya arenasına çıxarmaq olan şirkətimiz bu sahədə qısa müddət ərzində böyük inkişaf yolu keçib.

2020-ci il pandemiya səbəbilə arena müvəqqəti olaraq fəaliyyətini dayandırsa da, şirkətimiz kiberidman həvəskarlarını tək qoymayıb, onların boş vaxtlarından səmərəli istifadə etməsi üçün dayanmadan turnirlər təşkil edib. Məsuliyyətli öhdəlik qarşısında olan “Gaming League Azerbaijan” iştirakçıların sağlamlığını qorumaq məqsədilə evdən mümkün qədər az çıxmağa çağıran “Evdə Qal” başlıqlı turnirləri ilə böyük maraq oyadıb. Keçirilən turnirlər Azərbaycanın müxtəlif regionlarından yüzlərlə iştirakçı qəbul edib. Turnirlərin mükafat fondlu olması, qeydiyyatın ödəniş tələb etməməsi, təşkilati komandanın operativ fəaliyyəti, oyunların sosial platformalarda canlı yayımda olması iştirakçılar tərəfindən böyük maraqla qarşılanır.

Bu turnirlərimizdə “PUBG mobile” , “FIFA” , “CS-GO” , “Dota” , “Fortnite”  və s. oyunlar yer alıb. Təsadüfi deyil ki, “PUBG Mobile” üzrə Azərbaycan birinciliyinə 1000 nəfərdən çox iştirakçı qatılmış, sonda isə 10 nəfər bu turnirdə qalib statusu qazanıb. Bu birinciliyin hər bir turu sosial platformalarda canlı şəkildə tamaşaçılara təqdim olunub, oyunların hər biri şərh edilib, hər turdan sonra komandaların və oyunçuların analitikası aparılıb. Həmçinin “ FIFA” oyunu üzrə Azərbaycanda ilk dəfə biri yüksək, biri aşağı divizion olmaqla 2 liqa yaradılıb. Liqada 20 iştirakçı 38 tur qalib olmaq uğrunda 1 aydan çox mübarizə aparıb. Oyunların hər biri televiziya şərhçiləri tərəfindən şərh olunub, həm sosial platforma, həm də televiziyada canlı yayımda təqdim olunub. Dünyada futbol oyunlarının dayandığı bir vaxtda televiziyada yayımlanan kiberfutbol üzrə liqa Azərbaycan tamaşaçılarının marağına səbəb olub. Şirkətimizin təsis etdiyi kiberarena oyunçuların şəxsi bacarıqlarını inkişaf etdirməyə böyük şəkildə kömək olur. Belə ki, ən yeni nəsil kompüter və yüksək sürətli internetlə təchiz olunmuş arenamızda məşqlər edən oyunçulara hər bir şərait yaradılıb. Həmçinin, arenada həftə ərzində təşkil olunan müxtəlif növ oyunlar üzrə mükafat fondlu turnirlər, iştirakçılara gələcəkdə dünya arenasında ölkəmizi təmsil etmək üçün təcrübə qazandırır.

Bu kimi turnirlərin keçirilməsi hər gün daha da inkişaf anlamına gəlir. “Gaming League Azerbaijan”-ın bu istiqamətdə tutduğu yol professional oyunçular yetişdirməyə, ölkəmizi idmanın məhz bu növü üzrə beynəlxalq səviyyədə təmsil etməyə, dünya arenasında bayrağımızın dalğalanmasına yönəlib. Biz bu yolda möhtəşəm uğurlar qazanacağımıza böyük ürəklə inanırıq!

Bizim Partnyorlarımız